صرخة مليحة الصدر: عم تشطب إسم الماما وتغير صفة البابا ل أرمل
السفير نيوز_لبنان 🇱🇧
كتبت السيدة مليحة موسى الصدر على صفحتها الخاصة فيسبوك عبارات مؤثرة تعليقا على فيديو من تشييع والدتها في صور:
“عمهلك يا قلم!
ما تشطب هلقد بسرعة
عمهلك!
عم تشطب اسم الماما وتغير صفة البابا ل ارمل
بعرف مش اول حدا عم تشطبو
بس هل الاسم ممزوج بسنوات انتظار وظلم
ممزوج باوجاع سنين
ممزوج بذكريات مع قامة كلنا ناطرينها
ممزوج بحكايات وحكايات بهل الوطن
حكايات بتكسر الظهر وحكايات شامخة متل جبالنا
حكايات حفرت متل الجمر بقلوبنا
حكايات وعمر نعد تكة تكة من ساعة يلي سافر لوقت ما سكرت عيونها
كان عبالنا نوقع ع اجريك ونعزيك
كان عبالنا نضمك ونخفف وجعك
كان عبالنا نشمك ونمسح دموعك
كان عبالنا كتيير اشيا بس ليه لنزيد اوجاع فوق وجعك
شو هل الغربة يا بيي،
عظم الله اجرك
الله ياخد من عمري ويطول بعمرك يا سيدي وقائدي
ربي يحميك وترجع لساحة عملك.
بدي قلك انو لبنان موجوع
وبدو حدا ضحى متلك يجمع شملو
بدي قلك انو لبنان دفع تضحيات كتير بس بعدو ما ارتاح وبعد في كتار عم ينهشو في،
ما بعرف ليه عم بكتبن هون
اكيد بتمنى شي يوم توصلك هل الرسالة،
بس كمان لانو في كتار رح شاركهن مشاعر هني كمان حاسيين فيها
وبس يقرو رح يرفعو ايديهن ويدعو لرجعتك
مش لانو تذكرو بس شافو رسالتي لا سمح الله،
هني بيذكروك وبيدعولك كل لحظة وبيتمنو ترجع
اصلا قالت عنن الحجة ام صدري الله يرحمها انو ما شافت شعب وفي متل اللبنانيي
وعشان هيك قررت تضل هون وتخلي هل البيت مفتوح
يمكن عم بكتب لانو بدي حط شي ما يكون عليه في خلاف
انت ما في عليك خلاف،
كلو بيشهد بمظلوميتك
وشالونا كلهن ع رموش عينيهن بهل الشهر
ويمكن عم بكتب بركي بتشفق علينا هل السما وتفرجينا شي معجزة
نشوفك بيناتنا
مع انو انتظارك عزّ يا بابا
وانتظارك مفروض يكون علّمنا كتير
ومع انو حاولنا بس …
خلص رجاع
آمين
